அதிரடி சினிமா ஹீரோவான குமரி மாவட்ட வாலிபர்

அதிரடி சினிமா ஹீரோவான குமரி மாவட்ட வாலிபர்

18-09-2013

கன்னியாகுமரி மாவட்டம் இராஜக்கமங்கலம் அருகே உள்ள ஈத்தாமொழி பகுதியை சார்ந்தவர் பாரதி மோகன். இவர் இளங்கலை வணிகவியல் பட்டமும், திரைப்பட துறை தொடர்பான தொழில்நுட்ப கல்வியும் பயின்றுள்ளார். இவர் முதலில் சென்னை சென்றபோது திரைப்பட இயக்குனர் ஆக வேண்டுமென ஆசைப்பட்டார். இதற்காக பல திரைத்துறை வல்லுனர்களை சந்தித்துள்ளார்.

இந்நிலையில் பாரதி மோகன் சினிமா மீது உள்ள மோகத்தால் தானே கதாநாயகனாக நடிக்கும் நிலைக்கு வந்தார். இதனை தொடர்ந்து ஸ்ரீஹரி மூவீஸ் தயாரிப்பில் “அருவிக்கரையோரம்” என்ற சினிமாவில் கதாநாயகனாக நடித்துள்ளார். இந்த படம் சுமார் ஒரு ஆண்டுக்கு முன்னர் துவங்கப்பட்டு சென்னை ஏவிஎம் ஸ்டுடியோ, புளியந்தோப்பு மற்றும் குமரி மாவட்டத்தில் பெரும்பாலான இடங்களில் சூட்டிங் செய்யப்பட்டுள்ளது.

இந்த படத்தில் பாரதி மோகன் கதாநாயகனாக நடித்ததுடன், பாடல் மற்றும் தயாரிப்பு நிர்வாகத்தையும் செய்துள்ளார். இதில் சீலி மற்றும் ஜில் என்ற இருவர் கதாநாயகிகளாக அறிமுகமாகி உள்ளனர். பையா என்ற திரைப்படத்தில் துணை வில்லனாக நடித்த பொன்முடி மெயின் வில்லனாக நடித்துள்ளார். வசனம் பட்டுக்கோட்டை திருஞானமும், ஒளிப்பதிவு ஆதியும், இசை தசி என்பவரும் செய்துள்ளனர். “சமூக நிலைகளை அலசும் அதிரடி திரைப்படமாக உருவாகி உள்ளதாக” படத்தின் கதாநாயகன் பாரதி மோகன் நம்மிடம் கூறினார்.

“அருவிக்கரையோரம்” திரைப்படத்தின் பாடல் வெளியீட்டு விழா சென்னை ஏவிஎம்-ல் நடைபெற்றது. இதில் இயக்குநர் பேரரசு, மக்கள் குரல் ராம்ஜி, கவிஞர் காமக்கோடி உள்பட பலர் கலந்து கொண்டனர்.

“அருவிக்கரையோரம்” திரைப்படம் இம்மாதம் 19-ம் தேதி வெளியிடப்படுகிறது. நாகர்கோவில் முத்து தியேட்டரில் இப்படம் திரையிடப்படுகிறது. திருநெல்வேலியில் இரண்டு திரையரங்கில் வெளியாகிறது.