மணவாளக்குறிச்சி சின்னவிளை பகுதியை சேர்ந்த 2 பேர் உள்பட 11 பேர் இலங்கை கடற்படையினரால் சிறைபிடிப்பு
25-06-2014
தமிழக மீனவர்களை இலங்கை கடற்படையினர் சிறை பிடிக்கும் சம்பவம் தொடர்ந்து நடைபெற்று வருகிறது. இந்நிலையில் புதுக்கோட்டை மாவட்டம் ஜெகதாபட்டினத்தில் இருந்து விசைப்படகுகளில் ஆயிரத்திற்கும் மேற்பட்ட மீனவர்கள் கோட்டைபட்டினத்தில் இருந்து ஆயிரத்திற்கும் மேற்பட்ட மீனவர்களும் நேற்று முன்தினம் மீன்பிடிக்க சென்றனர்.
அவர்கள் இந்திய எல்லைக்குட்பட்ட பகுதியில் மீன்பிடித்து கொண்டிருந்தனர். அப்போது திடீரென அந்த பகுதிக்கு இலங்கை கடற்படையினர் படகுகளில் வந்து, 3 விசைப்படகுகளில் இருந்த 11 மீனவர்களை பிடித்து கைது செய்தனர். அவர்களை படகுகளுடன் இலங்கைக்கு கொண்டு சென்றனர்.
இதில் சிறைபிடிக்கப்பட்ட ஆல்பர்ட் ராஜன் (வயது 42), கிங்சன் பிரசஸ் (30) ஆகிய 2 பேர் கன்னியாகுமரி மாவட்டம் மணவாளக்குறிச்சி அருகே உள்ள மீனவ கிராமமான சின்னவிளை பகுதியை சேர்ந்தவர்கள் ஆவார். இவர்கள் கோட்டைப்பட்டினத்தில் தங்கி இருந்து விசைப்படகில் மீன்பிடிக்க சென்றபோது இலங்கை கடற்படையினரால் சிறை பிடிக்கப்பட்டுள்ளனர். இவர்கள் 2 பேரும் சிறைபிடிக்கப்பட்டுள்ளதால் சின்னவிளை கிராமத்தில் பரபரப்பு ஏற்பட்டுள்ளது.
Tags:
Manavai News
